मेरा प्रिय आमा, बुवा तथा दाजुभाई दिदीबहिनीहरु,

नमस्कार,

संघीय लोकतान्त्रिक गणतन्त्र स्थापना पछि मुलुकले धेरै परिवर्तन देख्यो, तर ती परिवर्तनको समानुपातिक लाभ सबै भूगोल र पुस्ताले पाउन सकेनन्। इलाम–१ सम्भावनाले भरिएको क्षेत्र हो। तर सम्भावना आफैं अवसर बन्दैन-त्यसका लागि दृष्टि, योजना र जिम्मेवार नेतृत्व चाहिन्छ। यहि सम्भावनाहरुलाई अवसरमा बदल्ने अठोटका साथ मैले यस क्षेत्रको प्रतिनिधि सभा सदस्यको लागि नेपाली काँग्रेसको तर्फबाट उम्मेदवार भई यो प्रतिबद्धता पत्र लिएर आएको छु |

राजनीति मेरो लागि पद होइन, जिम्मेवारी र पुस्तान्तरणको पुल हो-जहाँ जेन-जि पुस्ताको आकांक्षा र बुढा आमा–बुबाको अनुभूति एकआपसमा जोडिन्छ। इलामको आवाजलाई राष्ट्रिय राजनीतिमा प्रभावकारी रूपमा स्थापित गर्नु नै मेरो मूल प्रतिबद्धता हो। इलाम केवल भूगोल होइन, इतिहास, श्रम र संस्कृतिको संगम हो। सन्दकपुर  देखि माईसम्म हिँड्दा मैले किसान, युवा, श्रमिक, विद्यार्थी, कर्मचारी र उद्यमीका सम्भावना र संघर्ष नजिकबाट देखेको छु र नीति, योजना तर्जुमा गर्ने देखि लिएर कार्यान्वयनसम्मको अनुभव बटुलेको छु ।